Dadë (Dadı) (përkthyer)

Dadı është një komedi situatash turke e përgatitur nga Medyapım. Burimi i saj është sitkomi amerikan The Nanny, i transmetuar midis 1993 dhe 1999; ky serial u shfaq në më shumë se nëntëdhjetë vende dhe në shumë vende, mes tyre edhe tregje të Evropës Lindore dhe disa tregje aziatike, u xhirua version vendas. Këto adaptime në përgjithësi ndjekin nga afër skenarët origjinalë dhe bëjnë vetëm ndryshime të vogla sipas kulturës së tyre. Rolet kryesore të versionit turk i ndanë Gülben Ergen, Haldun Dormen, Kenan Işık dhe Seray Sever; në ekip janë edhe Sinem Kobal (Dilara), Zuhal Topal, Halit Ergenç, Nükhet Duru dhe Barış Falay.

Historia fillon me Melekin, që punon si shitëse në një dyqan nusesh. E reja, që ndahet nga i dashuri, rastësisht bëhet dado e tre fëmijëve të të zotit Ömer Giritli, të pasur dhe të ve. Teksa Meleku përballet me situata befasuese në këtë shtëpi me rregulla dhe sjellje të mira, me kalimin e kohës lind afrimitet mes Melekit dhe Ömerit. Seriali filloi më 9 shkurt 2001 në Show TV dhe u ndoq atje deri më 28 dhjetor 2001; nga 19 janari 2002 vazhdoi në Star TV dhe përfundoi më 28 tetor 2002 me episodin e 61-të. Në total përbëhet nga tri sezone.

Pas përfundimit të episodeve origjinale u xhiruan edhe pesë episode të veçanta të The Nanny, që nuk gjenden në asnjë adaptim tjetër të vendeve. Në këto episode, skenarin e të cilave e shkroi Tayfun Güneyer, rrëfehet jeta e Melekit dhe e Ömerit pas martesës.