Shërbim dhe mbrojtje (Servir y proteger) (përkthyer)

Servir y proteger (në turqisht "Hizmet et ve koru", pra "Shërbe dhe mbro") është një telenovelë me tematikë policore, e përgatitur nga Plano a Plano për televizionin shtetëror spanjoll Televisión Española. Filloi të hënën, 24 prill 2017, pasdite në La 1 dhe u transmetua çdo ditë nga e hëna te e premtja. Seriali, që zgjati shtatë sezone dhe 1372 episode, e bëri finalen më 16 janar 2023; episodet zgjasin nga 55 deri në 65 minuta.

Historia tregon punën e përditshme të një komisariati të Policisë Kombëtare (CNP) në jug të Madridit të sotëm. Alicia, një oficere e re e talentuar që sapo ka dalë nga akademia, caktohet në komisariatin Distrito Sur; ndërsa mëson hollësitë e punës nga detektivi me përvojë Miralles dhe nga Batista, që e njeh mirë rrugën, ajo hulumton edhe të vërtetën pas vdekjes së nënës së saj. Në sezonin e fundit në krye të kastit janë Luisa Martín, Pablo Puyol, Thais Blume, Juan Díaz, Candela Serrat, Roberto Álvarez, Pepa Aniorte, Mamen Camacho dhe Juanjo Artero; Verónika Moral është gjithashtu mes aktorëve.

Gjatë transmetimit të serialit kanë punuar rreth 60 aktorë të përhershëm, 300 të ftuar episodesh dhe 9.000 figurantë; nga 17.000 orë xhirime kanë dalë 1.200 orë transmetim dhe janë shkruar mbi 55.000 faqe skenari. Emri fillimisht do të ishte Kabul: servir y proteger. Sezoni i parë vazhdoi deri më 15 shkurt 2018, dhe TVE njoftoi në shtator 2022 se sezoni i shtatë do të ishte i fundit.