Erdhi tezja ime (Halam Geldi) (përkthyer)

Halam Geldi, që e trajton problemin e nuseve fëmijë nga jeta e përditshme e një fshati kufitar, është një dramë turke e vitit 2013. Filmin e ka prodhuar 5. Boyut Stüdyoları, regjinë e ka marrë përsipër Erhan Kozan; producentë janë Sami Dündar dhe Atıf Ulusoy, ndërsa muzika është e Ercüment Vural. Në shfaqje doli fillimisht me një seancë të veçantë në Festivalin e 50-të Ndërkombëtar të Filmit Altın Portakal të Antalyas, pastaj më 3 janar 2014 erdhi në kinema. Filmi, rreth 100 minuta, është konceptuar njëkohësisht si projekt i përgjegjësisë shoqërore.

Historia zhvillohet në Republikën Turke të Qipros Veriore, në fshatin Akıncılar, ku ezanit i shoqërohen këmbanat e kishës dhe muzikës turke melodi greke. Në këtë fshat kufitar jetojnë së bashku turq nga Diyarbakıri dhe turq qipriotë; ana përballë është fshati grek Limya. Filmi e përcjell përmes shikimit të fëmijëve historinë e hidhur të tri vajzave të reja nga Diyarbakıri, vetëm trembëdhjetë vjeç. Kështu i bashkon me anët e tyre njerëzore realitetin e “nuseve fëmijë”, jetën e fëmijëve me aftësi të kufizuara të lindur nga martesa me të afërm dhe problemin kufitar midis veriut dhe jugut të Qipros. Burçin Terzioğlu luan nënën Benek, Tugay Mercan babanë Ferhat; Miray Akay luan Reyhanin, Melis Kara Oyan, Necip Memili Halukun. Në kast ka edhe aktorë turq qipriotë dhe grekë.

Skenari bazohet në tekstin që gazetarja Evrim Kanpolat e shkroi duke e përshtatur nga një ngjarje e vërtetë. Në kritika është theksuar se filmi nis me humor dhe gradualisht rrëshqet drejt tragjedisë, dhe se kap shumë tema njëherësh.