Ali dhe Nino (Ali and Nino) (përkthyer)

Ali ve Nino (Ali and Nino), e llojit dramë romantike, është një film kinematografik i vitit 2016, bashkëprodhim britanik-azerbajxhanas. Filmi, regjinë e të cilit e ka marrë përsipër Asif Kapadia dhe skenarin Christopher Hampton, bazohet në romanin me të njëjtin titull, botuar në 1937, të shkrimtarit që njihet me pseudonimin Kurban Said. I përgatitur nën prodhimin e Kris Thykier, filmi bëri premierën botërore më 27 janar 2016 në Festivalin e Filmit Sundance.

Historia zhvillohet në Azerbajxhan, në prag të Luftës së Parë Botërore. Dashuria e Ali Khan Javanshir, myslimanit azerbajxhanas, dhe e Nino Kipiani, e krishterës gjeorgjiane, përplaset me kufijtë që vendosin familjet e dy të rinjve, fetë e tyre dhe shoqëria ku jetojnë. Në rolin e Alit është Adam Bakri, në atë të Ninos María Valverde. Familjen e Ninos e portretizojnë Mandy Patinkin (Duke Kipiani) dhe Connie Nielsen (Duchess Kipiani); në ekip është edhe aktori turk Halit Ergenç. Kundërvënia e Lindjes me Perëndimin, e Islamit me të krishterimin, e të riut me të vjetrin, e burrit me gruan, që është në themel të romanit, konsiderohet edhe boshti kryesor i filmit; kërkimi i së vërtetës dhe pajtimi janë tema që përsëriten në rrëfim.

Xhirimet e filmit u bënë kryesisht në Turqi dhe në Azerbajxhan. Kamerën e ka marrë përsipër Gökhan Tiryaki. Në prodhimin prej rreth 100 minutash përdoren së bashku anglishtja, rusishtja dhe turqishtja e Azerbajxhanit.