Parçalanmış (Aus dem Nichts) (tərcümə)

Paramparça, Almanca orijinal adı ilə Aus dem Nichts, beynəlxalq adı ilə In the Fade, Fatih Akının yazıb çəkdiyi 2017-ci il istehsalı Alman-Fransız filmidir. Melodram, məhkəmə filmi və qisas triller arasında gedib-gələn quruluşu ilə neo-noir kimi də xatırlanır. Ssenaridə Hark Bohm da Akına yoldaşlıq edib. Film 2004-cü ildə Köln şəhərində NSU-nun törətdiyi mismarlı bomba hücumundan ilhamlanıb. 26 may 2017-ci ildə Kann Film Festivalının əsas müsabiqəsində Qızıl Palma Budağı üçün nümayiş olunan film baş rolundakı Diane Krugerə Ən Yaxşı Qadın Aktyor mükafatını qazandırıb; 2018-ci il Qızıl Qlobusunda da Ən Yaxşı Xarici Dilli Film seçilib.

Krugerin canlandırdığı Katja bir bombalı hücumda Kürd əsilli həyat yoldaşı Nurini və altı yaşlı oğlunu itirir. Yeganə istəyi hücumun kimlər tərəfindən və nə üçün edildiyini öyrənməkdir; məhkəməyə müraciət edir. Dəlillər ifrat sağçı dairələrə işarə edir, lakin məhkəmə sübutları kifayət etməyən hesab edir və şübhəlilər cəzasız qalır. Bu qərar qarşısında qəzəbə qapılan Katja ədaləti öz üsulları ilə təmin etməyə girişir. Heyətdə Denis Moschitto, Numan Acar, Ulrich Tukur və Johannes Krisch da yer alır.

Almaniya filmi 90-cı Akademiya Mükafatlarında Ən Yaxşı Xarici Dilli Film nominasiyasında namizədi kimi seçib; layihə dekabrda dokuz filmlik qısa siyahıya düşüb, lakin yekun namizədlik əldə edə bilməyib. Beynəlxalq ad Queens of the Stone Age qrupunun bir mahnısından gəlir və qrupun solisti filmin musiqisini də bəstələyib. Almanca ad "heçlikdən" mənasını verir. 106 dəqiqəlik film Türkiyədə 2 fevral 2018-ci ildə nümayişə çıxıb.