Dëshmi (Kanıt) (përkthyer)

Seriali policor turk Kanıt, prodhim i ANS Productions, u transmetua në Kanal D midis 2010 dhe 2013. Seriali, që u transmetua gjatë tri sezoneve, mori fund më 3 shkurt 2013 me episodin e 100-të; përsëritjet u shfaqën më pas në Teve2. Prodhimin e ka marrë përsipër Abdullah Oğuz, skenarin Ahmet Saatçioğlu, ndërsa në karrigen e regjisorit janë ulur Cem Sürücü dhe Biray Dalkıran. Historitë bazohen te eksperta e shkencave gjyqësore Sevil Atasoy dhe thuhet se pjesërisht janë frymëzuar nga histori jetësh të vërteta.

Forma e serialit ndryshon nga një prodhim i zakonshëm detektivësh. Në çdo episod policët e seksionit të vrasjeve të Stambollit, komisari kryesor Orhan dhe komisari Selim, ndjekin një vrasje të re. Hetimit i japin kontribut personazhe që përsëriten, si eksperti i vendit të ngjarjes, laboranti i kriminologjisë dhe mjeku i autopsisë; pas episodit të 40-të në kast bashkohet edhe një ekspert i informatikës. Eksperti i vendit të ngjarjes dhe eksperti i kriminologjisë janë ndryshuar nga tri herë gjatë 100 episodeve dhe dy herë një komisar i dytë ka hyrë shkurtimisht në ekip.

Rolin e rrëfyesit e merr Prof. Dr. Sevil Atasoy: ndërhyn në mes të historisë dhe u shpjegon shikuesve provat dhe metodat e policëve. Motoja e saj është fjala “Nuk ka vrasje të përsosur”. Në kast kanë qenë emra si Engin Benli, Serenay Aktaş, Gökhan Karacık, Gonca Cilasun dhe Balamir Emren.