La Casa De Papel

La Casa De Papel (me titullin anglez të transmetimit Money Heist) është një serial spanjoll krimi dhe grabitjeje i krijuar nga Álex Pina. Episodi i parë u transmetua më 2 maj 2017 në kanalin spanjoll Antena 3, ndërsa produksionin e mori përsipër Atresmedia. Seriali tregon, nga këndvështrimi i personazhit "Tokyo" (Ursula Corbero), një nga grabitëset, dy grabitjet e mëdha e të gjata të planifikuara nga lideri me emrin e koduar "Profesori" (Alvaro Morte), së pari kundër Shtëpisë së Monedhës së Spanjës e më pas kundër Bankës Qendrore të Spanjës.

Në kast, përveç Alvaro Morte dhe Ursula Corbero, marrin pjesë edhe Pedro Alonso, Miguel Herran, Esther Acebo, Darko Peric, Alba Flores dhe Maria Pedraza. Pas sezonit të parë në Antena 3, Netflix, që bleu të drejtat e transmetimit, e publikoi serialin në mbarë botën duke e kthyer në një nga produksionet më të shikuara ndër gjuhët joangleze; seriali fitoi çmimin për serialin më të mirë dramatik në Emmy Awards Ndërkombëtare.