Təslimiyyət (Teslimiyet) (tərcümə)

Teslimiyet (beynəlxalq adı ilə Other Angels), Emre Yalgının çəkdiyi 2010-cu il istehsalı Türk dramasıdır. Ssenarini Yalgın, Zeynep Özcan ilə birlikdə yazmışdır. Film, İstanbulun Tarlabaşı məhəlləsində eyni evdə yaşayan və seks işçiliyi ilə dolanan dörd travesti qadının xəyallarını və həyat mübarizəsini təsvir edir. Povest, homofobiyaya və Türkiyədə LGBT hüquqlarına toxunur. Ssenari, Salonik Film Festivalının Balkan Fondu bölməsində ilk dördə girərək maliyyə dəstəyi almışdır.

Hekayənin mərkəzində, evdəki üç dostu ilə birlikdə dolanan Sanem durur. Bir xilaskar xəyal edən Sanem, məhəlləyə yeni köçən Gökhanın marağını çəkir; ikisi arasında səssiz bir münasibət başlayır. Evin gözlənilməz hadisələrlə sarsılması üzərinə Sanem, Gökhanın yanına sığınmaq məcburiyyətində qalır. Gökhanın Sanemin kimliyini, Sanemin də Gökhanın etibarlılığını sorğuladığı bir səyahət başlayır. Heyətdə Kanbolat Görkem Arslan, Özay Fecht, Seyhan Arman, Didem Soylu və Ayta Sözeri yer alır; Seyhan Arman, Hayat obrazını oynayır.

Travesti rollarını dörd trans şəxs, ailələrinin dəstəyi və cinsi kimliklərini qəbul etmələri ilə canlandırmışdır. Seyhan Arman, trans insanları kənarlaşdıran və çirkin göstərən bir film olsaydı Mədəniyyət Nazirliyinin bəlkə dəstək verəcəyini, filmi isə çox kiçik bir büdcə ilə çəkmək məcburiyyətində qaldıqlarını söyləmişdir. Film 17 Dekabr 2010-cu ildə məhdud sayda zalda ekranlara çıxmış; 29-cu Beynəlxalq İstanbul Film Festivalında və 22-ci Ankara Beynəlxalq Film Festivalında (17-27 Mart 2011) nümayiş olunmuş, Hamburqdakı Homoseksual Film Festivalında da tamaşaçı ilə görüşmüşdür.