Xoşbəxtlik (Mutluluk) (tərcümə)

Zülfü Livanelinin 2002-ci ildə nəşr olunan, bir çox dilə tərcümə edilən eyniadlı romanından ekrana uyğunlaşdırılan Türk dramı Mutluluk (ingilis dilindəki adı ilə Bliss) 2007-ci il istehsalıdır. Filmin rejissoru Abdullah Oğuz, istehsalçı şirkəti ANS Productions olub; ssenarini Livaneli, Kubilay Tunçer və Oğuz birlikdə yazıb, musiqini Livaneli bəstələyib. Film 17 mart 2007-ci ildə nümayişə çıxdı.

Hekayə adət-ənənə qurbanı olmaq üzrə olan Meryemlə başlayır: ailəsi namusunun ləkələndiyinə hökm edib onu öldürməyə qərar verir. Tapşırıq yaxın qohumları olan və hərbi xidmətdən təzəcə qayıdan Cemala verilir; ikili ölümə doğru yola çıxır, amma Cemal nə qədər qətiyyətli görünsə də cəzanı bir türlü yerinə yetirə bilmir. Yolları İstanbuldakı ziyalı mühitindən bezib qaçan professor İrfan Kurudalla kəsişəndə hekayə yol filminə çevrilir. Baş rolları Özgü Namal, Talat Bulut və Murat Han bölüşür. Heyətdə Lale Mansur və Mustafa Avkıran da yer alır.

Film 2007-ci il Antalya Altın Portakal Film Festivalının milli müsabiqəsində namizəd göstərildi və 44-cü festivalda ən yaxşı qadın aktyor mükafatını qazandı. 2007-ci ildə Mumbaidəki Asiya Film Festivalının və Romadakı Medfilm Festivalının açılış filmi seçildi. 2008-ci ildə Nürnberq Türk Filmləri Festivalında tamaşaçı və gənc münsiflər mükafatlarını, Mayami Beynəlxalq Film Festivalında beynəlxalq filmlər tamaşaçı mükafatını aldı; Avropa Şurasının Prix Odyssee İnsan Hüquqları Mükafatına da layiq görüldü.