Dondurmam Gaymak

Dondurmam Gaymak (beynəlxalq adı ilə Ice Cream, I Scream), Yüksel Aksunun yazıb quruluş verdiyi, müstəqil ruhlu Türk komediyasıdır. Film 24 noyabr 2006-cı ildə kinoteatrlarda nümayiş olunmağa başladı. Yeni Türk Kinosunun səmimi nümunələrindən sayılan film bir az Bisiklet Hırsızlarını, bir az da Latın Amerikasının sadəlövh filmlərini xatırladır. 25-ci İstanbul Film Festivalında Münsiflər Heyətinin Xüsusi Mükafatını qazandı və Türkiyənin 79-cu Akademiya Mükafatlarında Xarici Dildə Ən Yaxşı Film namizədi kimi göndərildi; lakin namizəd siyahısına düşə bilmədi.

Hekayə 1990-cı illərdə Egeydə, Muğlanın kiçik bir sahil qəsəbəsində baş verir. Dondurmaçı Ali Usta ətrafının istehzalarına məhəl qoymadan böyük dondurma markalarına qarşı mübarizəyə başlayır. Yerli televiziyaya reklam çəkdirir, borca motosiklet alır və arxasına qoşduğu qoşqu ilə kənd-kənd gəzib dondurmasını tanıdır; arxasınca da dondurmaya can atan uşaq dəstəsi gəlir. Kəndin dəcəl uşaqları motosikletə göz dikir və fürsət tapıb onu oğurlayır. Ali Usta motosikleti oğurlayanın böyük markalardan biri olduğunu düşünərək dilerləri bir-bir sorğu-suala tutmağa başlayır. Film nəhəng şirkətlərin hökmranlığını gülməli dillə tənqid edir və yox olmaqda olan kiçik sahibkarların dəyərlərinə sahib çıxır.

Rolları Turan Özdemir istisna olmaqla peşəkar aktyor olmayan Muğla bölgəsinin insanları canlandırır. Memet Ali Alabora çəkilişlərdən əvvəl aktyorları hazırlamış, çəkilişlər zamanı da aktyor məsləhətçiliyi etmişdir. Film böyük ölçüdə rejissorun öz imkanları və Muğla əhalisinin ianələri ilə maliyyələşdirilmişdir; ssenarisi 2007-ci ildə Say Yayınları tərəfindən kitab kimi nəşr olunmuşdur.