La Femme et le Pantin

La Femme et le Pantin është një dramë bashkëprodhim franko-italian e vitit 1959, e regjisuar nga Julien Duvivier. Është adaptimi i katërt kinematografik i romanit La Femme et le Pantin të Pierre Louÿs-it, botuar në vitin 1898. Romani ishte xhiruar edhe në vitin 1935 me titullin Der Teufel ist eine Frau, me Marlene Dietrich në rolin kryesor. Filmi i Duvivier-it u shfaq në Itali me titullin Femmina, në Mbretërinë e Bashkuar dhe Filipine me A Woman Like Satan; në Gjermani mbante titullin Ein Weib wie der Satan. Skenarin e kanë shkruar Marcel Achard, Duvivier dhe Albert Valentin.

Historia zhvillohet në Spanjë. Matteo Diaz, një burrë me ndikim dhe në moshë të shtyrë, bie në dashuri me vallëtaren e re Eva, vajzën e Stanislas Marchand-it, një shkrimtari të mëparshëm. Eva në fillim nuk i përgjigjet kësaj dashurie. Matteo bën gjithçka për të, deri sa harron edhe nderin e vet, dhe në fund Eva i dorëzohet dashurisë së tij. Evën e luan Brigitte Bardot, Matteon António Vilar, Manuelën Lila Kedrova, Stanislas-in Jacques Mauclair; në kast janë edhe Dario Moreno, Jess Hahn dhe Dominique Zardi.

Roli i dha Bardot-it mundësinë t'i përgjigjej pritshmërive të imazhit me të cilin e lidhte publiku i gjerë i kohës. Në ato vite shumë vetë e konsideronin si mishërimin e "gruas fatale"; prandaj çdo kush e ndjen që në fillim se si do të mbarojë historia. Eva ecën nëpër rrugë me krenari, në mënyrë që gjithkush ta vërejë tërheqjen e saj, dhe nuk ka dyshim se e di këtë. Matteo i gjorë nuk përpiqet as ta fshehë pasionin e tij.