Republika Osmane (Osmanlı Cumhuriyeti) (përkthyer)

Osmanlı Cumhuriyeti është një film turk komedie dhe historie alternative, i regjisuar dhe i shkruar nga Gani Müjde, që doli në kinema më 21 nëntor 2008. Prodhimi, me Ata Demirer në rolin kryesor, ndërtohet mbi pyetjen "Çfarë do të ndodhte nëse Mustafa Kemal Atatürk nuk do të kishte ekzistuar fare?"; me vdekjen e Mustafait të vogël në vitin 1888, Lufta e Çlirimit nuk ndodh kurrë dhe Perandoria Osmane, duke pranuar mandatin amerikan, e ruan ekzistencën e vet deri në vitin 2008.

Sulltani Osman VII, i luajtur nga Demirer, pasi bie në dashuri me një vajzë të re, kupton se është vetëm një kukull në duart e njerëzve rreth tij. Filmi u xhirua për pesë javë e gjysmë në 23 vende të ndryshme, mes tyre Topkapı Sarayı, Yıldız Sarayı dhe Aya İrini, dhe në të morën pjesë rreth 1500 vetë. Në trupë janë Vildan Atasever, Sümer Tilmaç, Ali Düşenkalkar dhe Sezen Aksu, e cila luan veten. Filmi, i prodhuar nga Avşar Film, ishte filmi i katërt turk me arkëtimet më të larta të vitit 2008.