Kapitan Frakasse (Le Capitaine Fracasse) (tərcümə)

Captain Fracasse, Théophile Gautierin 1863-cü il tarixli eyni adlı romanından ağ pərdəyə uyğunlaşdırılan, Fransız-İtalyan birgə istehsalı macəra filmidir. Fransız kinosunda “qılınc və plaş” deyə anılan sərgüzəşt ənənəsinə bağlıdır; tarixi bir dövrdə cərəyan edən, qılınc duelləri və məhəbbət çəkişməsi üzərində qurulmuş bir filmdir. Pierre Gaspard-Huit filmi 1960-cı ildə çəkmiş, film 1961-ci ildə nümayişə çıxmışdır. Fransada Le Capitaine Fracasse, İtaliyada Capitan Fracassa, Almaniyada Fracass, der freche Kavalier adı ilə tanınır. Fransız dilində çəkilən filmin müddəti 108 dəqiqədir.

Hekayənin qəhrəmanı Baron de Sigognacdır. Baron, evində qonaq qalan səyyar bir teatr truppasının gənc qız rollarını oynayan aktrisası Isabelleyə aşiq olur və onlarla birlikdə yola çıxmağa qərar verir. Yaxşı qılınc ustası olan baron, məhəbbəti uğrunda səhnə həyatına atılır və tamaşalarda “Kapitan Fracasse” adından istifadə edir. Lakin Isabellenin başqa bir pərəstişkarı olan Hersoq de Vallombreuse, rəqibindən qurtulub gənc qadını ələ keçirmək üçün heç nədən çəkinmir. Baş rolda Jean Marais görünür; ona Geneviève Grad və Gérard Barray yoldaşlıq edir. Louis de Funès isə yan rollardan birində yer alır.

Gaspard-Huit, ssenarini Jean Cosmosla birlikdə yazmışdır. Çəkilişlər Parisdəki Epinay Studiyalarında, ayrıca Rambouillet Meşəsində və Maintenon Qəsrində aparılmışdır. Heyətdə ayrıca Anna Maria Ferrero, Bernard Dhéran, Bernard Lajarrige, Christian Marin və Danielle Godet yer alır; Philippe Noiret də əsas aktyorlar arasında sayılmışdır.