Le Miracle des loups

Le Miracle des loups آندرے یونبیل کی ہدایت کردہ، 1961 کی فرانسیسی اور اطالوی مشترکہ پروڈکشن ایک تاریخی تلوار بازی اور مہم جوئی کی فلم ہے۔ ژاں ماریس کے مرکزی کردار والی یہ فلم اینری ڈوپوئی مازوئل کے 1924 میں شائع ہونے والے ناول سے ماخوذ ہے اور ریمون برنار کی 1924 کی اسی نام کی خاموش فلم کی ازسرنو تشکیل ہے۔ فلم جرمنی میں Im Zeichen der Lilie اور امریکہ میں Blood on His Sword کے نام سے دکھائی گئی۔

واقعات جون 1467 میں شروع ہوتے ہیں جب شارل لو تیمیر ڈیوک آف برگنڈی بنتا ہے، اور بعد کے مہینوں تک پھیل جاتے ہیں۔ فرانس کا بادشاہ لوئی یازدہم اپنے کزن ڈیوک کے ساتھ ایک طرح کی سرد جنگ میں ہے؛ ڈیوک کے غصے کے دورے اور غدار سیناک کی بدعہدیاں امن کو خطرے میں ڈالتی ہیں۔ بادشاہ اپنی منہ بولی بیٹی (گاڈ ڈاٹر) ژان دی بووے کو اس پر فریفتہ شارل کے حوالے کر کے معاملہ ٹھنڈا کرنے کا منصوبہ بناتا ہے۔ حالانکہ ژان بادشاہ کی خدمت میں موجود نوجوان نائٹ روبر دی نوویل کی محبت میں گرفتار ہے اور یہ عشق بادشاہ کے منصوبے کو خطرے میں ڈال دیتا ہے۔ فلم کا نام اس کلیدی منظر سے آتا ہے جس میں ژان پر بھیڑیوں کے جھنڈ کا حملہ ہوتا ہے۔ بادشاہ اور ڈیوک کے درمیان کشمکش حقیقی ہے، روبر اور ژان کی محبت فرضی۔ اداکاروں میں روزانا سکیافینو، ژاں لوئی باروں اور روژے ہانین بھی شامل ہیں۔

فلم بندی کا ایک بڑا حصہ کارکاسون کی فصیلوں پر ہوا؛ سیٹ اور لوازمات میں حقیقت پسندی کو پروڈیوسروں کی دی ہوئی اہمیت سیٹ پر وقتاً فوقتاً مسئلہ بنتی رہی۔ فلم 6 ستمبر 1961 کو فرانس میں اور 12 جنوری 1962 کو جرمنی میں نمائش کے لیے پیش ہوئی۔ یہ تقریباً 126 منٹ کی ہے۔