Uliksi (Ulisse) (përkthyer)

Ulisse (Ulysses) është një film fantastik aventure i vitit 1954, i përshtatur nga eposi i Homerit Odysseia dhe një nga shembujt e zhanrit "peplum". Filmi i drejtuar nga Mario Camerini është bashkëprodhim i Italisë, Francës dhe Shteteve të Bashkuara të Amerikës; producentët e tij janë Dino De Laurentiis dhe Carlo Ponti, shoqëria prodhuese Lux Film. Skenarin e shkroi Camerini me Franco Brusati; në ekipin prej shtatë shkrimtarësh ishin edhe Ben Hecht dhe Irwin Shaw. Në Itali doli në ekrane më 6 tetor 1954, ndërsa në SHBA, pasi u shpërnda një vit më vonë nga Paramount Pictures, shpesh përmendet edhe si prodhim i vitit 1955.

Kirk Douglas luan mbretin e Itakës, Odiseun. Silvana Mangano merr rol të dyfishtë: Penelopën, gruan besnike të Odiseut, dhe magjistaren Qirka. Anthony Quinn luan Antinoin, kryesuesin e atyre që kërkonin Penelopën, kurse Rossana Podestà Nausikan. Filmi mbetet relativisht besnik ndaj vijave kryesore të eposit; për ta nxënë në rreth njëqind minuta, ngjarjet janë shkurtuar, disa janë hequr ose janë rirenditur.

Zgjedhja e parë për regjinë ishte Georg Wilhelm Pabst, por ai mori pjesë vetëm në fazën përgatitore, u tërhoq në çastin e fundit dhe puna i mbeti Camerinit. Drejtori i fotografisë Mario Bava dha kontribut në drejtimin e skenave të Polifemit. Pamjet në Technicolor i përkasin Harold Hal Rossonit dhe kritiku John Eames e ka gjetur filmin mbi mesataren e epikave italiane të kohës. Filmi u bë prodhimi më i ndjekur në Itali në sezonin 1954-1955.