Sindroma e Stendalit (La sindrome di Stendhal) (përkthyer)

The Stendhal Syndrome (në italisht La Sindrome di Stendhal) është një thriller psikologjik italian i vitit 1996 me firmën e Dario Argento; vjen nga tradita e giallos. Filmi doli në ekran në Itali më 26 janar 1996 dhe u prit mirë në vend si nga kritikët, ashtu edhe nga shikuesit; arkëtoi rreth 5,4 miliardë lireta. Emrin e merr nga çrregullimi shpirtëror që e fut njeriun përballë veprave të artit në një gjendje të ngjashme me transin dhe bazohet te libri i psikiatres Graziella Magherini mbi këtë temë.

Në rolin kryesor është Asia Argento, vajza e Argentos. Anna Manni, detektive policie që punon në Firence, ndjek gjurmët e një vrasësi serial, Alfredo Grossi (Thomas Kretschmann), që përdhunon dhe vret gra. Para një pikture në Galerinë Uffizi ajo bie nën ndikimin e sindromës së Stendhalit dhe i bie në duar vrasësit. Kur shpëton, jeta e saj nuk është më si më parë; identiteti dhe gjendja shpirtërore i tronditen, kufiri midis gjahtarit dhe gjahut turbullohet. Marco Leonardi, Paolo Bonacelli dhe Luigi Diberti janë gjithashtu në pjesën e aktorëve. Ndryshe nga giallot e mëparshme të Argentos, identiteti i vrasësit dihet që në fillim; theksi është te tmerri psikologjik.

Skenarin Argento e shkroi me Franco Ferrini; muzikën e kompozoi Ennio Morricone. Argento tregon se si fëmijë ka rënë në një trans të ngjashëm në shkallët e Partenonit në Athinë. Roli i Annës, për të cilin fillimisht u mendua Bridget Fonda e pastaj Jennifer Jason Leigh, përfundimisht iu dha Asia Argentos. Filmi është prodhimi i parë në kinemanë italiane që përdor efekte kompjuterike (CGI); tërheq vëmendjen edhe për referencat te historia e artit, nga Bosch te Caravaggio e Magritte.