Një përrallë Krishtlindjesh (Un conte de Noël) (përkthyer)

Un conte de Noël (A Christmas Tale) është një komedi dramatike franceze që Arnaud Desplechin e xhiroi në vitin 2008 dhe, siç kuptohet nga titulli, është një film për Krishtlindjet. Skenarin e ka shkruar regjisori bashkë me Emmanuel Bourdieu; prodhues është Pascal Caucheteux. Filmi, që zgjat rreth dy orë e gjysmë, zhvillohet në Roubaix dhe tregon takimin e Krishtlindjeve të një familjeje të madhe me marrëdhënie të tensionuara. Garoi për Palmën e Artë në Festivalin e Filmit në Kanë 2008, mori nëntë nominime për César dhe i solli Jean-Paul Roussillonit çmimin e aktorit më të mirë në rol dytësor.

Në qendër të historisë është familja Vuillard. Nënës Junon (Catherine Deneuve) i thuhet se, nëse nuk i bëhet transplant i palcës kockore, i kanë mbetur vetëm disa muaj jetë; pas këtij lajmi familja, që jeton e shpërndarë prej vitesh, mblidhet në shtëpinë e babait Abel (Jean-Paul Roussillon). Vajzën e tyre Elizabeth e luan Anne Consigny, Henrin, që e ka këputur lidhjen me familjen pasi motra e tij ia pagoi borxhet gjashtë vjet më parë, Mathieu Amalric. Paul, djali gjashtëmbëdhjetëvjeçar i Elizabethës, ka probleme psikike dhe duhet shtruar në klinikë. Në pjesën e aktorëve janë edhe Melvil Poupaud, Emmanuelle Devos dhe Chiara Mastroianni. Ndërsa kërkohet një donator i përshtatshëm, dalin në sipërfaqe mëri të vjetra, xhelozi dhe afrime të papritura.

Xhirimet janë bërë në Roubaix në vitin 2007, ndërsa muzikën e ka përgatitur Grégoire Hetzel. Filmi mban firmën e Why Not Productions.