Sabrina

Sabrina, Sydney Pollack tərəfindən idarə edilən 1995-ci il istehsalı Amerika romantik komediya-dram filmidir. Billy Wilderin Humphrey Bogart, Audrey Hepburn və William Holdenli 1954-cü il tarixli klassik filminin yenidən çəkilişi olan film, mənşəyini Samuel A. Taylorun 1953-cü ildə səhnələşdirilən Sabrina Fair adlı pyesindən alır. Ssenarisini Barbara Benedek və David Rayfielin yazdığı filmdə Julia Ormond, şoferin qızı Sabrinanı canlandırır; Harrison Ford və ilk kino rolu ilə Greg Kinnear isə bir-birindən çox fərqli Larrabee qardaşlarını oynayır.

Çəkilişləri New Yorkda, Massachusettsdə və Parisdə həyata keçirilən film, Paramount Pictures tərəfindən 15 dekabr 1995-ci ildə nümayişə çıxdı. Kassada gözləntilərin altında qalan film, tənqidçilərdən qarışıq reaksiyalar aldı; xüsusilə aktyor heyəti tərifləndiyi halda orijinalla müqayisələr aparıldı. Buna baxmayaraq film iki Akademiya Mükafatı və üç Qızıl Qlobus namizədliyi əldə etdi; John Williamsın bəstələdiyi musiqilər arasında Stingin səsləndirdiyi Moonlight da Oskara namizəd göstərildi.