Galipoli (Gelibolu) (përkthyer)

Gelibolu (me titullin ndërkombëtar Gallipoli) është një dokumentar turk i vitit 2005, skenarin e të cilit e ka shkruar dhe e ka drejtuar Tolga Örnek. Ai e rrëfen Betejën e Çanakkales të vitit 1915 jo vetëm nga ana turke, por edhe përmes syve të ushtarëve britanikë dhe të Anzakëve, domethënë të Korpusit të Ushtrisë së Australisë dhe Zelandës së Re. Filmi doli në kinematë e Turqisë më 18 mars 2005, në përvjetorin e 90-të të betejës; në prill u shfaq edhe në kinematë e Zelandës së Re dhe të Australisë. Sponsori kryesor është Grupi Doğuş.

Rrëfimi nxjerr në pah vuajtjet dhe ndjenjat e ushtarëve në llogore, pa marrë parasysh fenë, gjuhën apo kombësinë. Historinë e mbartin letrat dhe ditarët e dhjetë personazheve kryesore: dy britanikë, tre zelandezë, tre australianë dhe dy turq. Në kastin e zërave janë Jeremy Irons, Sam Neill dhe Zafer Ergin, së bashku me Sungun Babacan dhe Nüvit Candaner. Dokumentari shfrytëzon letra, dokumente dhe fotografi që deri atëherë nuk kishin dalë në dritë.

Përgatitja zgjati rreth gjashtë vjet; u shqyrtuan mbi shtatëdhjetë arkiva, u analizuan më shumë se 80 mijë fotografi dhe u punua me 16 historianë ndërkombëtarë. Dhanë kontribut edhe Muzeu Mbretëror i Luftës i Britanisë, Muzeu i Luftës i Australisë, Ministria e Kulturës e Zelandës së Re dhe muzetë ushtarakë turq. Filmi u xhirua në High Definition dhe u transferua në 35 mm; përmendet si dokumentari i parë i xhiruar në këtë mënyrë në Turqi. Producent është Hamdi Döker, shoqëria prodhuese Ekip Film, drejtor i fotografisë Volker Tittel, kompozitor i muzikës Demir Demirkan. Shpërndarjen e ka marrë përsipër Özen Film. Më parë Örnek kishte drejtuar dokumentarët Atatürk, Nemrut dhe Hititler.