Dolmen

Dolmen është një miniserial francez i vitit 2005; si zhanër bashkon elementë misteri, krimi dhe romantikë. Prodhimi, i përbërë nga gjashtë episode prej rreth 90 minutash secili, është një rrëfim me një sezon të vetëm. Transmetimi i parë u bë në kanalin TF1 nga 13 qershori deri më 18 korrik 2005; në të njëjtat javë serialin e transmetuan edhe RTL-TVI në Belgjikë dhe TSR në Zvicër. Skenarin e kanë shkruar Nicole Jamet dhe Marie-Anne Le Pezennec, në karrigen e regjisorit ka qëndruar Didier Albert.

Historia zhvillohet në Ty Kern, një ishull shkëmbor në brigjet e Bretanjës. Policja Marie Kermeur kthehet në ishull për t'u martuar me Christian-in, me të cilin e kishte kaluar fëmijërinë. Por përgatitjet e dasmës shpejt kthehen në përgatitje të funeralit, sepse ishulli bëhet skenë e ngjarjeve të çuditshme dhe të llahtarshme që ndodhin njëra pas tjetrës. Në rolin kryesor është Ingrid Chauvin; e shoqërojnë Bruno Madinier, Yves Rénier, Georges Wilson, Xavier Deluc, Martine Sarcey, Jean-Louis Foulquier, Hippolyte Girardot, Manuel Gélin dhe Micky Sébastian.

Seriali u shfaq edhe jashtë Francës: në Kebek u transmetua nga 27 tetori 2006 në kanalin Mystère, në Gjermani u ndoq në fund të vitit 2006 në RTL II në tri pjesë me titullin Dolmen – Das Sakrileg der Steine. Prodhimi u ritransmetua në verën e vitit 2024 në kanalin 6ter, duke nisur më 20 korrik, dhe mund të ndiqet edhe në platformën TF1+.