Erkan Sekman

Erkan Sekman — Tərcümeyi-hal

Erkan Sekman türk futbolunda stoper və bek kimi fəaliyyət göstərən, karyerasını çoxlu sayda klub arasında davam etdirmiş müdafiəçidir. Malatyanın Pütürge rayonunda doğuldu, futbola İstanbulda yetişdi. İlk peşəkar müqaviləsini Beşiktaşla imzalasa da bu komandanın formasını heç geyinmədi. Sonrakı illərdə Konyaspor, Gaziantepspor, Antalyaspor və Göztepe kimi kluplarda oynadı; doğulduğu vilayətin komandası Yeni Malatyaspora isə bir neçə dəfə geri döndü.

Karyerasının ilk mərhələsi akademiya və icarələrlə keçdi. Sekman 1999-da Doğan Güneşspora, 2001-də Beşiktaşa keçdi; 2003-də əsas komandaya yüksəldildi, lakin iki mövsüm ardıcıl Fatih Karagümrüke icarəyə verildi. 2006-cı ildə Konyaspora transfer oldu, 2008-2009 mövsümündə isə Erdal Kılıçarslanın müqabilində mübadilə olunaraq Gaziantepspor ilə üç illik müqavilə imzaladı. 2009-2010 mövsümünün ikinci yarısını icarə ilə Denizlisporda keçirdi və icarə müddəti bitəndə Gaziantepspora qayıtdı.

2010-2011 mövsümündə Antalyaspor ilə razılaşan oyunçu o mövsüm çıxdığı 30 oyunun hamısına start heyətində başladı və bir qol vurdu. Ertəsi mövsüm yalnız altı oyunda forma geyib heyətdən kənarda qaldı; ardınca Mersin İdman Yurdu ilə bir illik müqavilə imzaladı. 2012-2013-də yenidən Konyasporda idi, 2013-2014-də Orduspor formasını geydi. Sonradan Göztepe və Yeni Malatyasporda oynayan Sekman 2016-2017 mövsümünün ortasında 2. Liqa komandası Kastamonuspor 1966 ilə razılaşdı.