Alişan

Alişan — Tərcümeyi-hal

Alişan (əsl adı Serkan Burak Tektaş; 19 iyun 1976-cı ildə İstanbulda anadan olub) — türk ərbəsk-pop müğənnisi, teleaparıcı və aktyordur. Beyoğlunun Şişhane məhəlləsində dünyaya gələn sənətçinin ailəsi Bingöllüdür və zaza mənşəlidir.

Kuvay-ı Milliye ibtidai məktəbi, Özəl Şişli Kolleci və Özəl Evrim Liseyində oxuduqdan sonra İstanbul Texniki Universitetinin Konservatoriyasında təhsil alıb. 1997-ci ildə çıxardığı "Sana Bir Şey Olmasın" albomu ona böyük uğur gətirib və ardınca ərbəsk-pop üslubunda bir sıra albomlar buraxıb.

Aktyor kimi "Gırgıriye" filminin davamı sayılan "Cennet Mahallesi" (2004) serialındakı Fərhad rolu ilə geniş tanınıb; "Aynalı Tahir", "Eyvah Babam", "Aşkına Eşkıya", "Mert ile Gert" və "Dostlar Mahallesi" kimi seriallarda da rol alıb, televiziyada aparıcılıq da edir.