Luciferi

Lucifer, i zhvilluar nga Tom Kapinos, është një serial amerikan fantastik policor-komedi i frymëzuar nga një personazh i DC Comics; transmetimi, që filloi në Fox më 25 janar 2016, zgjati gjashtë sezone dhe përfundoi më 10 shtator 2021. Edhe pse Fox-i e ndërpreu serialin në maj të vitit 2018, pas tri sezonesh, pas fushatës së fansave për shpëtimin e tij Netflix e bleu prodhimin një muaj më vonë dhe xhiroi edhe tri sezone të tjera.

Në rolin kryesor Tom Ellis luan Lucifer Morningstar, një përshtatje alternative të personazhit të krijuar nga Neil Gaiman, Sam Kieth dhe Mike Dringenberg. I mërzitur nga të qenit në krye të Ferrit, Djalli e lë fronin dhe shpërngulet në Los Anxhelos, ku hap një klub nate luksoz me emrin Lux. Kur para klubit vritet një yll i popit, në të zgjohen emocione që nuk i ka provuar prej kohësh; kjo ngjarje e shpie të bëhet këshilltar i Departamentit të Policisë së Los Anxhelosit. Kështu, teksa zgjidh krime me detektiven Chloe Decker, jeta e tij ndryshon rrënjësisht. Miqja e tij më e ngushtë, Mazikeen (Maze), është një demone e paepur. Në distribucion janë gjithashtu Lauren German, Kevin Alejandro, D. B. Woodside, Lesley-Ann Brandt, Rachael Harris, Aimee Garcia dhe İnbar Lavi.

Prodhimin e kanë marrë përsipër Jerry Bruckheimer Television, DC Entertainment dhe Warner Bros. Television. Xhirimet fillimisht u bënë kryesisht në Vankuver, ndërsa në fillim të sezonit të tretë prodhimi u zhvendos tërësisht në Los Anxhelos. Mendimet e kritikëve për sezonin e parë u ndanë në dysh; sezonet e mëpasshme u pritën më pozitivisht dhe interpretimi i Tom Ellis u lavdërua shpesh.