Təsadüfi Sevgi (Kazara Aşk) (tərcümə)

Kazara Aşk, prodüserliyini Koliba Film-in üzərinə götürdüyü, Sadullah Celen-in rejissorluq etdiyi türk romantik komediya serialıdır. İlk seriyası 24 iyun 2021-ci ildə ekrana çıxan film, 30 sentyabr 2021-ci ildə yayımlanan 13-cü seriyası ilə finala çıxaraq bir mövsümdə tamamlanmışdır.

Hekayə, universiteti bitirdikdən sonra sevdiyi kişi ilə evlənib xoşbəxt bir ocaq qurmağı arzulayan Artvinli Şimal ilə Qaziantebli varlı bir ailənin gənc varisi Civanın qəza nəticəsində yollarının kəsişməsi ilə başlayır. Bir-birini heç tanımayan bu iki gəncin qəzadan başlayan tərəfdaşlığı, ardıcıl deyilən yalanlar və gözlənilməz hadisələrlə çıxılmaz bir vəziyyət alır. Müxtəlif mədəniyyətlərdən gələn Qaradəniz və Saydam ailələri qarşılaşdıqları sürprizlər qarşısında heyrətə düşərkən iki yad adam arasındakı qeyri-müəyyənlik də getdikcə dərinləşir. Serialın baş rollarını Ümit Kantarcılar və Sude Zülal Güler bölüşmüşdür.