Joseph Balsamo

Joseph Balsamo, André Hunebellenin çəkdiyi 1973-cü il istehsalı Fransa-Almaniya birgə layihəsi olan televiziya mini serialıdır. Alexandre Dumasın Bir Hekimin Anıları silsiləsinə aid eyniadlı romanından Pierre Nivollet tərəfindən uyğunlaşdırılan layihə Jean Maraisin baş rolda olduğu yeddi bölümdən ibarətdir və hər bölüm təxminən 52-55 dəqiqə davam edir. Serial Fransada 8 yanvar - 19 fevral 1973-cü il tarixləri arasında ORTF-in birinci kanalında yayımlandı və 2002-ci ildə France 3-də yenidən göstərildi. Kvebekdə isə 1974-cü ilin əvvəllərində Radio-Canada televiziyasında tamaşaçı ilə görüşdü. Almaniyada Cagliostro adı ilə və üç bölümlük daha qısa montajla ZDF-də yayımlanan layihə Tele-München ilə Technisorun birgə prodüksiyası kimi ZDF və ORTF adına həyata keçirildi. Hekayə Dumasın romanlarından yola çıxaraq Cagliostro kimi də tanınan sirli Joseph Balsamonun macəralarını mövzu edir. Heyətdə Jean Marais ilə yanaşı Udo Kier də yer alır.