Shane Larkin

Shane Larkin — Tərcümeyi-hal

DeShane Davis Larkin (d. 2 oktyabr 1992; Sinsinnati, Ohayo ştatı), qurucu oyunçu mövqeyində çıxış edən amerikalı-türk peşəkar basketbolçudur. Sonuncu dəfə Basketbol Superliqası və EuroLeague təmsilçisi Anadolu Efesdə forma geyinib. Beynəlxalq səviyyədə Türkiyə millisini təmsil edir.

Mayami Universitetində kollec basketbolu oynayan Larkin, 2013-cü il NBA Seçmələrində Atlanta Hawks tərəfindən 1-ci turun 18-ci seçimi kimi seçilib, lakin elə həmin gün Dallas Mavericksə mübadilə edilib. Dallas Mavericksdən sonra NBA-da ardıcıl olaraq New York Knicks və Brooklyn Netsdə forma geyinib. 2016-17 mövsümündə İspaniyanın Liga ACB və EuroLeague təmsilçisi Saski Baskoniada oynadıqdan sonra, Boston Celtics ilə razılaşaraq NBA-ya qayıdıb. 2018-ci ildə Basketbol Superliqası və EuroLeague təmsilçisi Anadolu Efeslə razılaşıb. 2019-cu ildə EuroLeague final oyununda çıxış edib və CSKA-ya qarşı 29 xal ataraq final mərhələsinin ən nəticəli oyunçusu olub. 2020-21 mövsümündə EuroLeague-in 50-40-90 klubuna seçilən Larkin, mövsüm ərzində bir oyunda 49 xal ataraq turnir rekordunu yeniləyib. Bu rekord 2024-cü ildə bir oyunda 50 xal atan Nigel Hayes-Davis tərəfindən sındırılıb. 2021 və 2022-ci illərdə arda-arxası EuroLeague çempionu olub və hər iki dəfə EuroLeague-in Mövsümün Ən Yaxşı Beşliyinə seçilib. Bundan əlavə, Larkin EuroLeague-də ən çox Həftənin MVP-si seçilən basketbolçudur.

Larkin, Anadolu Efes forması ilə çoxsaylı yerli uğurlar əldə edib. Xüsusilə baş məşqçi Ergin Ataman rəhbərliyi altında 2019, 2021 və 2023-cü illərdə Türkiyə Liqasının çempionu olub. 2018, 2019, 2022 və 2024-cü illərdə Cumhurbaşkanlığı Kubokunu qazanıb, 2022-ci ildə isə Türkiyə Kubokunun qalibi olub. Larkin, 2025-ci ildə EuroLeague Basketball tərəfindən müəyyən edilən EuroLeague tarixinin ən yaxşı 25 oyunçusu siyahısına daxil edilib. Larkin, 2020-ci ildən etibarən vətəndaşlığa keçmiş oyunçu statusu ilə Türkiyə millisində forma geyinir. O, həmçinin 2025-ci il Avropa Basketbol Çempionatında gümüş medal qazanan heyətin üzvü olub.